Samuel-Masa — Chapter 5

Filistia mite in Pasian' Thuciamna Singkuang a mat uh ciangin Ebenezer panin Ashdod-ah pua uh hi

Tua ciangin Filistia-te in Pasian' Thuciamna Singkuang la-in Dagon inn sungah paipihin Dagon kiangah koih uh hi

Ashdod mite a zing ciang zingsang tungin a thawh uh ciangin, Topa' Thuciamna Singkuang mai leilakah Dagon na maipuk hi. Tua ahih ciangin amaute in Dagon phongto-in ama omna munah koihkik uh hi

Ahih hangin a zing ciang zingsang tungin amaute a thawh uh ciangin Topa' Thuciamna Singkuang mai leilakah Dagon na maipuk leuleu a, Dagon lutang leh a khutte gel kitankhia-in sangkil gei-ah om a, Dagon a pumpi bek omlai hi

Tuni dongin Dagon siampite leh Dagon inn-ah a tumte khempeuh in hih thu hangin Ashdod-a Dagon sangkil tung siklo uh hi

Topa in Ashdod khua mite nakpi takin gawt a, amah in uilut tawh Ashdod khua leh a gamsung lausakin gimsak hi

Ashdod mite in hih bang thute a muh uh ciangin amaute in, “Israel-te' Pasian' Thuciamna Singkuang eite kiang panin a paikhiat loh phamawh hi. Bang hang hiam cih leh amah in eite leh i pasian Dagon hong gawt hi,” a ci uh hi

Tua ahih ciangin amaute in mi sawlin Filistia uliante khempeuh khawm uh a, “Israel-te' Pasian' Thuciamna Singkuang bang cih ding ihi hiam?” a ci uh hi. Amaute in dawngin, “Israel-te' Pasian' Thuciamna Singkuang Gath-ah koihsak ni,” a ci uh hi. Tua ahih ciangin amaute in Israel-te' Pasian' Thuciamna Singkuang tua lai-ah paipih uh hi

Ahih hangin amaute in tua Gath khua-ah a tun'pih khit uh ciangin Topa in tua khuapi langpan'in apkhapna lianpi piangsak a, amah in khuapi mite a moi a hamin gimsakin amaute in uilut vei uh hi

Tua ahih ciangin amaute in Pasian' Thuciamna Singkuang Ekron-ah puak uh hi. Ahih hangin Pasian' Thuciamna Singkuang Ekron a tun' ciangin Ekron mite kiko uh a, “Kote leh ka mite uh a that dingin amaute in Israel-te' Pasian' Thuciamna Singkuang ko kiangah hong paipih uh hi,” a ci uh hi

Tua ahih ciangin amaute in mi sawlin Filistia uliante khempeuh khawmin, “Kote leh ka mite uh hong thahlohna dingin Israel-te' Pasian' Thuciamna Singkuang puakkhia un la, ama omna munah ciahkiksak un,” a ci uh hi. Bang hang hiam cih leh a khuapi sung khempeuhah si dektaka apkhapna om hi. Pasian in tua lai-ah amaute nak gawt mahmah hi

A silo sunte in uilut vei uh a, khuapi sunga kahna awging vantung dongah kizato hi.