Piancilna — Chapter 41
Josef in Faro' Mang Khiatsak
Tua zawh kum nih bit khit ciangin Faro in mang man a, amah Nail gun gei-ah ding hi
Nail gun sung panin bawngpi a zol a thau sagih hong paikhia a, amaute in phai lopate ne uh hi
Amaute' khit ciangin Nail gun sung pan mahin a gulhgawng a gawng bawngpi dang sagih hong paikhia a, Nail gun gei-a bawngpi dangte kiangah ding uh hi
Tua ciangin a gulhgawng bawngpi gawng sagihte in a zol a thau bawngpi sagihte netum uh hi. Tua ciangin Faro khanglo hi
Tua ciangin ihmu-in a nih veina mang man hi. A taksa a hoih buhvui sagih kung khat tungah vui hi
Tuate' khit ciangin nisuahna huih in a theemsak a hawm vui sagih hong pokhia hi
A vui hawmte in a taksa a dim vui sagihte valhtum uh hi. Tua ciangin Faro khanglo a, tua pen a mang na hi hi
Tua ahih ciangin zingsangin a lungkham hi. Amah in mi sawlin Egypt mitphial siamte khempeuh leh a mipil khempeuh samsak hi. Faro in amaute' kiangah a mang gen a, ahih hangin Faro' tungah a khiatna a gen thei kuamah omlo hi
Tua ciangin an piapipa in Faro' kiangah, “Tuni-in ka khialhnate ka phawkkik hi
Faro, ama nasemte tungah heh a, kei leh an huanpipa, inncing mangpa' inn sungah hong khum lai-in
amah leh keimah in zan khat sungin mang ka man uh a, a mangte in a khiatna tuam ciat nei hi
Inncing mangpa' nasem ahi Hebru mi tangval khat tua lai-ah kote tawh om hi. Ama kiangah ka gen uh ciangin, amah in ka mangte uh hong khiatsak a, ka mang uh tawh a kizui tuakin a khiatna hong gen hi
Amah in kote tungah a khiatna hong gen bangin hong tung hi. Kei pen ka za-ah hong kikoih kik a, an huanpa kikhailum hi,” a ci hi
Tua ciangin Faro in mi sawlin Josef samsak a, amaute in manlang takin thongmial sung panin amah a paikhiatpih uh hi. Amah in a mul kiatin a puan a khek khit ciangin, Faro' mai-ah hong pai hi
Faro in Josef kiangah, “Mang khat ka man a, a khiatna a gen thei kuamah omlo hi. Nang in mang na zak ciangin a khiatna gen thei, ci-in hong kigenna ka za hi,” a ci hi
Josef in Faro dawngin, “Kei' pilna tawh mang a khiathei ka hi kei hi. Pasian in Faro' tungah a hoihlamin dawn'na hong pia ding hi,” a ci hi
Tua ciangin Faro in Josef kiangah, “Ka mangin Nail gun gei-ah ka ding hi
A thau a zol bawngpi sagih Nail gun panin hong paikhia a, phai lopate ne uh hi
Tuate' khit ciangin a hehpihhuai a gulhgawng, Egypt gamsung khempeuhah tua bang ka muh ngeiloh bawngpi dang sagih hong pai hi
A gawng a gulhgawng bawngpite in a masa a thau bawngpi sagihte netum uh hi
Ahih hangin amaute in tuate a nek khit uh ciangin, a nek khitlam uh kuamah in theilo hi. Bang hang hiam cih leh amaute pen a tunga mah bangin gulhgawng lai veve uh hi. Tua ciangin ka khanglo hi
Tua ciangin ka mang mahin kung khat tungah a dim a hoih buhvui sagih a vuikhia zong ka mu hi
Tuate' khit ciangin nisuahna huihpi in a keusak a hawm, a theem vui sagih hong po a
a vui hawmte in a vui hoih sagihte valhtum uh hi. Mitphial siamte kiangah ka gen a, ahih hangin kei kiangah hong gentel thei khat beek omlo hi,” a ci hi
Tua ciangin Josef in Faro' kiangah, “Faro' mangte gel pen khat ahi hi. Pasian in ama bawl ding, Faro' tungah hong kilangsak khin hi
A hoih bawngpi sagihte, kum sagih hi a, a hoih buhvui sagihte zong kum sagih mah ahi hi. A mang khiatna a kibang ahi hi
Tuate' khit ciangin a hong paikhia, a gawng a gulhgawng bawngpi sagihte, kum sagih hi a, nisuahna huihpi in a theemsak buhvui sagihte zong kialpi kum sagih mah ahi hi
Faro' kianga kong gen bangin Pasian in ama hih ding, Faro' tungah hong lak khin ahi hi
Egypt gamsung khempeuhah kum sagih sung hauhna hong tung ding a
ahih hangin tua khit ciangin kialpi kum sagih sung hong tungin, hauhna ngeisa khempeuh Egypt gam sungah kimangngilh ding hi. Kialpi in gamsung netum ding a
nasia mahmah ding ahih manin, tua hong tung ding kialpi' huhau-in gam sungah hauhna kitheilo ding hi
Faro' mang nih a phakna pen tua thu Pasian' sehsa hi, a cihnopna hi a, Pasian in tomno sungin hong tungsak ding hi
Tua ahih ciangin tu-in Faro in thu ngaihsun siam mipil khat tengkhia in la, Egypt gamsung a uk dingin amah koih in
Faro in gam sungah vaihawm ulian seh in la, a kihauh kum sagih sungin Egypt gam leitang pana piang sung panin nga-ah khat la in
Hong tung ding kum hoih sunga an khempeuh amaute khawmsak in la, khuapite sungah an nek dingin Faro' ukna nuai-ah antangte kholin, amaute kemsak in
Kialpi hangin gamsung a siatlohna dingin Egypt gam sungah a hong tung ding kum sagih kialpi dalna dingin a kikoihcing an hi ding hi,” a ci hi.
Egypt A Ukin Josef Kikoih
Hih a thugen pen Faro leh a nasemte khempeuh in hoihsa uh hi
Faro in a nasemte kiangah, “Ama sungah Pasian Kha a omna, hih bang midang mu ding ihi hiam?” a ci hi
Tua ahih ciangin Faro in Josef kiangah, “Pasian in hihte khempeuh nang hong lak khin ahih manin, nang bangin thu ngaihsun siam leh a pil midang omlo hi
Nang pen ka inn sungah ulian na hi ding a, nangma thupiak bangin ka mite khempeuh gamta ding uh hi. Kumpi tokhom tawh kisai-in kei pen nang sangin ka lian zaw ding hi,” a ci hi
Faro in Josef' kiangah, “Egypt gam khempeuh a uk dingin nang kong koih khinzo hi,” a ci hi
Tua ciangin Faro in a min gelhna zungbuh ama khut tung panin suahkhia-in Josef' khutah bulh a, puan hoih mahmah tawh amah zemin, a ngawngah kham khainiang khat oksak hi
Ama leeng nihna tungah Josef tuangsak a, ama mai-ah uliante kiko a, “Khukdin' un!” ci hi. Tua ahih ciangin Egypt gam khempeuh a ukin amah koih hi
Tua thamloin Faro in Josef kiangah, “Kei pen Faro ka hi hi. Nangma thukim lohin Egypt gamsung khempeuhah kuamah in a khut a khe nangawn uh liiklo ding uh hi,” a ci hi
Faro in Josef' min Zafenath-paneah a phuak hi. Amah in On khua siampipa Potifera' tanu Asenath tawh kitengsak hi. Tua ahih ciangin Egypt gam sungah Josef zin kawikawi hi
Egypt kumpipa Faro' nasemin a tum hunin Josef kum sawmthum pha hi. Faro' omna panin Josef paikhia a, Egypt gamsung khempeuhah zin hi
A kihauh kum sagih sungin leitang in tampi piangsak a
Egypt gamah tampi a om laitakin amah in tua kum sagih sunga ante khempeuh khawm a, khuapite sungah an khol hi. A kiima lote panin khuapi simah amah in an khol hi
A teh ding a khawl dong zahin Josef in tuipi gei sehnel zahin antang tampi khol hi. Bang hang hiam cih leh kiteh khin zolo hi
Kialpi kum hong tun' ma-in Josef in On khua siampipa Potifera' tanu Asenath tawh tapa nih nei hi
Josef in a ta masa Manasseh a phuak hi. Amah in, “Pasian in ka haksatna khempeuh leh ka pa' innkuan khempeuh a mangngilhin hong bawl hi,” ci hi
A nihna pen amah in Efraim a phuak hi. “Ka thuakna gam sungah kei a pungin hong bawl hi,” ci hi
Egypt gam sunga a om kum sagih sung hauhna hun bei ta hi
Josef' gensa bangin kum sagih kialpi hong kipan hi. Gamdang khempeuhah kialpi tung a, ahih hangin Egypt gamsung tengah an om hi
Egypt gam khempeuh a kial ciangin, an ngenin mite Faro' tungah kiko uh hi. Faro in Egypt mite khempeuh tungah, “Josef' kiangah pai un. Note' tunga ama hong cih bangin gamta un,” a ci hi
Tua ahih ciangin gam khempeuhah kialpi a tun'kim ciangin Josef in ankholna innte khempeuh hongin, Egypt mite tungah a zuak hi. Bang hang hiam cih leh Egypt gamah kialpi nasia mahmah hi
Tua thamloin, leitung khempeuhah kialpi nasia ahih manin, antang lei dingin Josef' kiangah leitung mi khempeuh hong pai uh hi.