Job — Chapter 26

Tua ciangin Job in dawng a

“A hehpihhuai kei nong huhna, a thazawngkhal kei nong hotna, hih bang ahi hiam

Kei bang mihai tungah thu manpha nong gen a, pilna thu tampi nong pulak hi

Tua bang thu a gen dingin kua in hong sawl a, kua' lungsim hong pulakkhia na hi hiam

“Misite' gam kiling a, a sunga a teng mite launa tawh a ling hi

Pasian' muhna-ah misite' gam kilang sinsen a, a muh theihlohna dingin a liah bangmah omlo hi

Pasian in mun awng tungah vanpi hong zalkhia a, bangmah in a lenlopi-in leitung a khai lingleng hi

Amah in meiilom lakah tuite khol a, tua a gik mahmah tui meii a puazosak hi

Amah in kha a liah ding bawl a, meii tawh kha a khuh hi

Amah in muh tawpna-ah git dinden a, khuavak leh khuamial a khen hi

Amah in vanpi a pua khuampite a taii ciangin tua khuampite lau-in a ling uh hi

Ama thahatna tawh tuipi zo a, ama siamna tawh tui ganhing golpi Rahab thatlum hi

A hu a san' ciangin vantung teng siang pah a, ama khut in a taikhia gulpi thatlum hi

Hihte pen ama vangliatna themkhat bek hi pan a, i zak thute pen a hemlam bek hi pan hi. Pasian a liatna taktak kua'n theizo ding ahi hiam?” a ci hi.