Jeremiah — Chapter 51

Topa in a cihin-ah: “En un, Babylon khuapi leh Khaldea mite a susia dingin keimah in huih ka nungsak ding hi

A zapsiang ding mi Babylon-ah ka sawl ding a, amaute in tua gam a zapsiang ding uh hi. Gimna ni hong tun' ciangin amah a sim dingin mun khempeuh panin hong pai ding uh a, gamsungah bangmah a omsak nawn kei ding uh hi

Thaltawite a thal uh lawnsak man kei un la, sik puan silhte dingsak man kei un. A tangvalte uh map kei un la, a galkap honpi khempeuh uh nuaimang khin un

Khaldea gam kongzing lakah liamgawp ding uh a, a si ding uh hi

Bang hang hiam cih leh Israel leh Judah mite Israel mite' Siangtho Pa tungah a khialh uh hangin, amaute' Pasian, Vanglian Topa in amaute taisan nailo hi

Babylon khuapi sung panin taikhia un. Mi khempeuh kisuahtak ciat un. Babylon' mawhna sihpih kei un. Bang hang hiam cih leh a mawhna bangun a thuakna dingun Topa' thuhkik hun ahi hi

Babylon khuapi, Topa' khutsungah a om kham hai tawh kibang a, leitung buppi zu a khamsak hi. Gamdangte in a zu a dawn manun a hai khin uh hi

Thakhat thu-in Babylon puk a, kisiagawp hi. Ama-a' dingin kap un. A liammate-a' dingin zatui la un, damzo khathei lai ding hi

Ahi zongin midangte in, ‘Babylon khua i damsak nop hangin a damzo ding hi nawnlo hi. Nusia ta un la, i gam ciat zuanin ciah ni. Ama tunga thukhenna in vantung dong ban khinta a, van dawn dong a paito hi,’ a ci uh hi

“Keima mite in, ‘ Topa in thuman ihihna hong kilang khiasakzo hi. Hong pai un, Topa Pasian' nasepna Zion khua-ah va taangko ni,’ a ci uh hi

Thaltangte hiam un. Lumte la un. “ Topa in Babylon khua susia nuam ahih manin Media kumpite ahanthawn hi. Bang hang hiam cih leh hih pen a biakinnpi hangin Topa' thukkikna ahi hi

Babylon khuakulhpi tungah dial khai un la, galvil ding tampi koih un. Cingsak un la, galte a buksim dingin kithawi un. Bang hang hiam cih leh Babylon khua mite tawh kisai-in Topa in a gensa teng a geel khinzo a, a sem khinzo hi

Aw, tui tamna gei-ah a teng mite, sum a hau note aw, na hun uh beita a, na nuntakna khau uh kitat ta hi

Vanglian Topa in, ‘Kauphe zahin a tam mite kong simsak ding a, amaute in note hong zo-in a kiko ding uh hi,’ ci-in keima min tawh ka kiciam khinzo hi

“Pasian in ama vangliatna tawh leitung bawl a, ama pilna tawh leitung piangsakin, ama siamna tawh vantung a zal hi

Amah a pau ciangin vantungah tuite ging huhu a, leimong panin tuikhu a suaksak hi. Guah zukna dingin khua phiasak a, a saal sung panin huih a nungsak hi

Mi khempeuh hai-in pilna neilo hi khin uh a, kham seekte khempeuh in a milim uh a maizumlawh uh hi. Bang hang hiam cih leh a milim uh zuau hi lel a, nak theilo hi

Kiman'na a neilo, a haihuaipi hi a, gim a kipiak ni ciangin a kisia ding uh hi

Jakob' Pasian tua bang hilo a, na khempeuh a piangsakpa ahi hi. Ama-a' dingin Israel mite teel a, ama min pen Vanglian Topa ahi hi

“Babylon aw, nang pen ka sekpi leh ka galhiam na hi a, nang hong zangin gamdangte ka satnen a, kumpi gamte ka susia hi

Nang hong zangin sakolte leh a tunga a tuangte, sakol leengte leh a hawlte

papite leh nupite, khanghamte leh khangnote, tangvalte leh nungakte

tuucingte leh a tuute, lokhote leh a tute, kumpite leh ukpite ka satnen hi

“ Topa in kong cihin-ah, Babylon khua leh Khaldea gamah a tengte khempeuh in Zion khua-ah siatna a bawl manun note' muhna-ah ka thuk ding hi

“En in, mualpi bangin lian a, leitung khempeuh a susiazo Babylon aw, nang kong langpan' hi, Topa in kong ci hi. Keimah in nang' langkhatah ka khut ka zan ding a, mual dawn panin nang hong khukkhia-in, kong kangtumsak ding hi

Na suangte innkiu suangin a kiciang kei ding a, innbul suang nuaiphahin a kizang kei ding hi. A tawntungin gam simtham na suak ding hi, Topa in kong ci hi

“Gal a sim dingin leitung bup thu pia un la, gamdangte kiangah peengkul mut un. Amah a sim dingin kithawisak un; Ararat, Minni, leh Ashkenaz gamte simsak un. Makai khat teel un la, kauphe honpi zahin a tam sakolte va la un

Amah a sim dingin gamdangte kithawisak un. Media kumpipa, a makaite, leh a ukna gam khempeuh kithawisak un

Babylon gam in na sa-in, kitomin a ling hi; bang hang hiam cih leh ama tungah Topa' ngimna tangtung a, Babylon gam gamsimtham suaksak a, kuamah a tengsak kei hi

Babylon galkapte in do nawnlo uh a, a phualpi uhah a khawl uh hi. A tha uh om nawnlo a, numei tawh a kibang uh hi. A innte uh kihalsak a, a khuakongpi a kikalhna siktawnte a kitan hi

Babylon kumpipa kiangah thu a ko dingin a hong pai kamtaite a ciah leh a kuan kiphamat uh a, ‘Mun khempeuh panin galte in Babylon khua hong simin

guna ngahmun teng la khinmang uh a, galpan'na teng mei tawh kihalin, galkapte lau mahmah uh hi,’ a ci uh hi

Vanglian Topa, Israel-te' Pasian in ka hong genin-ah, Babylon mite tawlkhat khit ciangin anlak bangin kila ding a, sual tunga ancil bangin a kicilgawp ding hi

“Babylon kumpipa Nebukhadnezzar in Jerusalem khua hong valhtumin, hong sukham gawp hi. Beel hawm bangin a hawmin hong koih a, gulpi' valh bangin hong nawmvalh hi. Ka neihsa a limnono tawh amah kivak kham a, kei a hong hawlkhia hi

Kei' tung leh ka mipihte tungah hong kibawl ngongtatna Babylon mite tungah tung ta hen, ci-in Zion khua-ah a tengte in gen ta uh hen. Khaldea mite in ka thuakna teng thei ta hen, ci-in Jerusalem khua in gen ta hen

“Tua ahih manin Topa in kong cihin-ah: En un, na thu uh ka hong sepsak ding a, note-a' dingin ka hong thuksak ding hi. A bual ka keusak ding a, a ciktui ka kangsak ding hi

Tua ciangin Babylon khuapi innsia losia suakgawp ding a, se-alte' ten'na mun suakin, a lipkhaphuai, simmawhna tawh a kiphitsan, kuamah a ten'lohna gamkhing a suak ding hi

Babylon mite humpinelkai bangin a hawk khawm ding uh a, humpinelkai no bangin a ciak lualua ding uh hi

A duh mahmah laitakun amaute ka vak ding a, khua a phawk nawnloh dong uh zu ka khamsak ding hi. A tawntungin ihmu paisuak ding uh a, a khanglo nawn kei ding uh hi, Topa in kong ci hi

Gawh dingin a kipaipih tuuno bangin ahi a, tuutal leh keeltal bangin ahi zongin amaute ka paipihsuk ding hi

“Leitung bup in a pahtawi Babylon khuapi kila ta hi. Gamdangte' lakah Babylon khua, a mulkimhuai a suak ta hi

Babylon gamah tuipi hong kahto a, tuihual lauhuaite in a tum ta hi

A khuapite a mulkimhuai suak a, lei keuna sehnel gam a suak khinta hi. Gamsungah kuamah tenglo a, kuamah in kantan ngeilo hi

Babylon khuate' pasian Bel zong gim ka pia ding a, a na guksa teng ka lakkhiatsak kik ding hi. Gamdangte in amah bia nuam nawnlo ding uh hi. Babylon khuakulhpi kicim khinta hi

Ka mite aw, amaute lak pan hong paikhia un. A lauhuai Topa' hehna panin mi khempeuh kisuahtak ciat un

Gamsungah kamdawn a kigen sawnte hangin lungkia kei un; lau kei un. Kum khatin thu khat kigen a, a kum kik ciangin thudang khat kigen lel hi. Gamsungah ngongtatna thu om a, kumpi khat leh kumpi khat kidona thu kigen thei hi

Tua ahih manin en un, Babylon khua-a milimte gim ka piak hun hong tung ding hi. A gam buppi ka zumhuaisak ding a, khuasungah kithatin a tuk ding uh hi

Tua ciangin vantung, leitung, leh a sunga om nate khempeuh in Babylon' hangin lungdamin la a sa ding uh hi. Bang hang hiam cih leh leilu lam panin amaute a susia ding mi hong pai ding uh hi, Topa in kong ci hi

Babylon khua in leitung khempeuhah mite a sihsak mah bangin tu-in amah in sihna a thuak ding hi

“Namsau in a hong thah khakloh a nungtalai note aw, pai un; dingding kei un. Gamlapi pek panin Topa hong phawk un la, Jerusalem khua zong mangngilh kei un

Note in, ‘Kote in maizumna ka thuak uh a, simmawhna kam ka za khin uh hi. Minsiatna in ka maitang uh hong tuam khin hi. Bang hang hiam cih leh Topa' biakinn siangtho gamdang mite in a hong laksak uh hi,’ na ci uh hi

Tua ahih manin en un, Topa in kong cihin-ah, Babylon khua-ah a om a milimte uh tungah thu ka khen ni hun hong tung ding a, gamsung khempeuhah a liamte a tau ding uh hi

Babylon khua vantungah kahto thei a, a sangpi-ah kiptakin galdalna a bawl thei ahi zongin, Topa in kong cihin-ah, kei' kiang panin amah a suankhia ding mi a hong pai teitei ding hi

“Ngai un! Babylon khua-ah mi kiko hi. Khaldea gamsung mite a kisuksiatna kahna awging ahi hi

Bang hang hiam cih leh Topa in Babylon khua maimangsak a, a gamlumna zong a daisak hi. Galte, tuihual lum henhan bangin hong lut uh a, awng gawpin, a gamlum henhan uh hi

Babylon khua a susia ding mi khat hong pai khinzo hi. A galkapte uh kiman khin a, a thalte uh a tum a tel suak khin hi. Bang hang hiam cih leh Topa, a thukkik thei Pasian hi a, a thukkik taktak ding hi

A kumpi uliante leh a mipilte uha kipan ukpite, uliante, leh galkapte, zu ka khamsak ding a, a tawntungin ihmu-in a khanglo nawn kei ding uh hi, ci-in Vanglian Topa a kici kumpipa in kong gen hi

Vanglian Topa in ka hong genin-ah: Babylon khuakulhpi sah mahmahin a muan'huai mahmah leilakah cimsuk ding a, a sang mahmah khuakongpite zong mei tawh kihaltum ding hi. Mite' nasepna a mawkna suak a, minamte' hanciamnate vutlevai a suak hi,” a ci hi

Neriah' tapa, Mahseiah' tupa Seraiah pen Zedekiah kumpipa' thuvanpa ahi hi. Kumpi Zedekiah in Judah gamah a ukzawh kum li ciangin Seraiah leh kumpipa Babylon-ah a pai uh hi. Tua hun laitakin keimah in Seraiah thu ka vaikhak hi

Keimah in Babylon khua tawh kisai-in Babylon khua-ah a tung ding gimna khempeuh laibu khat sungah ka gelh hi

Seraiah kiangah, “Babylon khua na tun' ciangin hih thute khempeuh na sim ding a

tua khit ciangin, ‘ Topa aw, hih munah mihing hita leh ganhing hita leh bangmah tengloin, a tawntungin a kinusia a suahna dingin na suksiatna ding na gen khinzo hi,’ ci-in thu ngen in

Hih laibu sunga thute mite' zakin na sim khit ciangin suang khat tawh henkhawm in la, Eufratis gun sungah paai in. Tua khit ciangin

‘Babylon khuapi' gitlohna hangin a tungah gimna ka tungsak ding a, tu-a bangin Babylon khuapi zong tumsukin a hong dawkkikto nawn kei ding hi,’ ci-in gen in,” ka ci hi. * * Jeremiah' thugenna tu-a ciang ahi hi.